هل فعلا -منذ أن خُلقنا- مجبرين أن نعيش؟

لو كان ذلك صحيحاً فلماذا لا تدفع ثمناً لاستهلاكك الأكسجين لكي تتنفس؟

كم أهدرت من أنفاسك في لهو أعمى؟

كم من الوقت كانت دنياك مضاءة دون أي مجهود فعلته؟

كل لحظة تعيشها كنت تجد كل ذلك بلا أي مجهود، لكن الآن حان الوقت لتعيش تجربة ستُحاسب فيها على كل ما أهدرت من عطايا الدنيا المجانية، لكن على الأقل ستعيش في ذلك المستنقع يوماً تستحق فيه أن تعيش..

اسم الكاتب: كيرلس هاني Kiro Hany

اسم العمل: مستنقع جينوس – سلسلة مدن الظل

نوع العمل: فانتازيا/ مغامرة عن دار إبهار

عدد الصفحات: ٣٢٨

الغلاف:

أول حاجة محتاجة أشيد بيها فعلا في العمل دا هي الغلاف، بداية من ألوانه والعناصر المتواجدة فيه (اللي مع انخراطك في أحداث الرواية بتدرك أد ايه هي معبرة عن أجزاء كتيرة في الكتاب بما فيها الحبكة الأساسية)، عنوان الرواية نفسه طريقة كتابته حلوة جدا، دا غير الجزئية اللي في ظهر الكتاب اللي بتشوق القارئ برده بشكل كبير لأنك تفهم الرواية دي وأحداثها وعالمها بيناقش فكرة ايه، وايه الإطار اللي بيدور فيه، الرواية كانت فعلا في قائمتي مشترياتي وأنا راحة معرض الكتاب لكن الأكيد إن لو مكنش عندي أي علم بيها، وشفت غلافها كنت هتحمس ليها وهشتريها فورا، عشان كدا بأكد أن المصمم محمد دربالة حقيقي اغلب تصميماته للأغلفة اللي شفتها حاجة ممتازة جدا.

ملخص القصة:

بتبدأ القصة بواحد وواحدة فاقدين الذاكرة صحيوا في غرفة غريبة عليهم، وبيبدأوا يحاولوا يخرجوا منها رغم التحذير الواضح ليهم بالمصير المظلم اللي هيتعرضوا له قصاد دا..

لكن كعادة فطرة الانسان بأن المرفوض مرغوب بيقرروا أنهم يخرجوا من الأوضة، وساعتها بيلاقوا نفسهم في عالم ديستوبي اسمه (المستنقع) ، واللي التنفس فيه بيكون عن طريق حاجة اسمها (بطاريات تنفس) وبتدوم ليوم واحد بس! وعشان يقدروا يوصلوا لها بيخوضوا أهوال غير عادية، ودا عشان يستمروا في الحياة ليوم واحد بس!

الحبكة والسرد:

بداية قبل أي حاجة لازم أحي الكاتب على فكرته الجديدة الخاصة بحبكة الرواية، أنا فعلا مشفتش عمل قبل كدا بيناقش الفكرة دي بالطريقة دي، اللي فعليا مش بتتضح غير في الأخر وبتكون مترابطة مع الأحداث بطريقة صادمة..

ودي نقطة تانية اظهر فيها الكاتب موهبته:

وهو أنه يعيشنا في أجواء غامضة، ومتسارعة، ويربطها في النهاية بالحبكة الرئيسية بشكل عبقري.

وبالنسبة لنقطة الأحداث المتسارعة فالأحداث فعلا رتمها تصاعدي بشكل جبار.. خلاني فعلا مش قادرة اسيب الكتاب غير بأني أجبر نفسي على دا.

في الحقيقة أن في الرواية دي كل شيء مختلف عن الشكل المعتاد لرواية الفانتازيا العادية: بداية من طريقة تقسييم الفصول، الرمزية الغير عادية الموجودة في أدق تفاصيل وسطور الرواية، التساؤلات الفلسفية (اللي صراحة مشفتش قبل كدا رواية فانتازيا بتخاطب القارئ بتساؤلات، وأفكار مشابهة)..

الكاتب فعلا أخدنا في رحلة لأننا نشوف الحياة بكل جوانبها، وصراعاتها، وأملها بمنظور جديد تماماً..

تصميم العالم كان مبهر، ديستوبي للغاية حتى في أدق تفاصيله، لكن مع دا قدر الكاتب أنه ينوع في أجزائه المختلفة، والأهوال اللي الأبطال بيتعرضوا لها مع كل محطة جديدة في رحلتهم بطريقة جنبت أن يكون فيه ذرة ملل واحدة في سير الأحداث.

لغة الكاتب كانت فصحى سليمة جدا مناسبة للقراء على اختلاف أشكالهم، وقدر أنه يطعمها بكمية اقتباسات غاية في الروعة، ومناسبة لمواقف كتير ممكن نتعرض لها في حياتنا العادية.

الشخصيات:

في النقطة دي بالتحديد لازم أشيد تاني بمهارة الكاتب أنه يخلينا نتعلق بشخصيات احنا فعلا مشفناش أي ماضي ليهم ومنعرفش عنهم أي حاجة! لكن برغم دا قدر الكاتب يخلق شخصيات يخلينا احنا اللي نشهد جوانبهم النفسية المبنية على ماضي لسه مش ظاهر لنا، ونتعلق بيهم بشكل كبير على مدار الأحداث..

ودا يخليني اسأل: طب لو الكاتب كان اظهر كل ما يتعلق بالشخصيات دي كان هيوصل مدى تأثرنا بيهم لايه؟!

وعشان كدا فعلا الكاتب تميز جدا في النقطة دي.

الملخص:

عمل فانتازي عظيم جدا، بيشي أننا قدام موهبة كبيرة، وكاتب تقيل.. قدر أنه يخلق حبكة، وفكرة فلسفية جديدة تماما في إطار فانتازيا مشوقة، وحماسية لأقصى الحدود.

ممكن في بعض المواضع حسيت الدراما زايدة شوية لكن مجملاً الأحداث كانت صادمة، ومتصاعدة برتم عالي جدا.. تخلي القارئ فعلا يلهث وراها، تصميم الشخصيات والعالم (الديستوبي بكل تفاصيله)، اللغة، الوصف، والاقتباسات كانوا في غاية الروعة، وأنا في أشد الانتظار لأعمال الكاتب الجديدة، وبرشح العمل دا بقوة.

#مستنقع_جينوس