#ديمونولوچي
الكاتب/ هيثم موسى
دار إبهار للنشر والتوزيع
التقييم آخر البوست
أنا مش من عشاق أدب الرعب والماورائيات … علشان بحسها محاولة جاهدة من الكاتب للضغط على غددي الكظرية لافراز الأدرينالين … لكن انك تعملي رواية رعب أو ماورائية فيها كائنات غريبة وشياطين وتربطهالي كمان ( من البداية بالمرض النفسي وتخليني أشك في الطبيب ولا المريض ولا … ولا … ولعد كدا تاخدني معاك في حوارات يمين وشمال وتمشي معايا بسهولة وسلاسة وتحسسني ان الأحداث حقيقية) فدا نوع محبب بالنسبالي ....
وأتقن هيثم هذا الشئ بشكل موزون جداً فلا افراط وجدت ولا تفريط شعرت … في بداية الرواية وجدته يروي بأسلوب الراوي العليم وقلت لنفسي الوصف جميل والكلام يشد يا سلام لو كان كتبها بلسان الراوي نفسه (منظور الشخص الأول) وكأن الكاتب قد سمعني فأعطاني فوراً الرد على سؤالي وأتى بشخص آخر يتدخل في الأحداث فيثير الارتباك ويضفي غموض على شخصية البطل ووقتها لا تعلم هل الأحداث حقيقية أم مجرد خيال في ذهن البطل، والسياق دا من الغموض والمرونة في سرد القصة يتحقق بسهولة ووضوح للقارئ من خلال -الراوي العليم- ، فقد وجدت دقة الكاتب ونجاحه في اختيار أسلوب الحكي وكان يحتاج القليل من زيادة الوصف ودا راجع من جمال الخيال ووضوح الصورة للقارئ بسهولة وأنت بتقرأ هتلاقي الخيال بينساب بتدفق واضح وجميل والصورة واضحة كأنك شايفها وكمان بدون عدد كلمات كتير تسبب ملل أو تشتت …
وهو دا مصدر البلاغة …
التصويرات الجمالية محستش بوجود زخرفة وزركشة أوي ويمكن دا راجع لنوع العمل فهو أصلاً عمل خيالي الكاتب بيبذل مجهود لرسم الصورة الخيالية بلغة سليمة فلو ركب خيال فوق خيال هتطلع حاجة غير واضحة ودا تاني دليل على أن الأداة التي يستخدمها الكاتب في كتاباته هي الميزان وليس القلم شابوه مجدداً …
عاوز أتكلم وكتييير عن اللغة مش هقول عن وضوح الألفاظ ورصون الفصحى ووضوح الصورة والخيال ولا عن الحوار اللي بالفصحى اللي تحس أنه مترجم لأ دا أنا عاوز أتكلم عن السلامة اللغوية من حيث سلامة القواعد الإعرابية ودا طبعاً في حدود معرفتي المتواضعة بقواعد النحو ومقارنة بالروايات الحديثة فإن الرواية دي علي مستوى عالٍ جداً من سلامة قواعد اللغة بجد شابوه وأظن دا مجهود الكاتب، وأكاد أجزم أن الكاتب لم يبذل مجهود فقط في الخيال والحبكة والبحث ولكن كمان في مراجعة عمله ودقة القواعد فيه بجد عظمة على عظمة … النحو مش بس التشكيل في علامات كتير ظاهرة ……
.
الكاتب ركز على الحبكة بشكل كبير جداً خصوصاً في بدايات الرواية واقترب من الشخصيات رويداً رويداً ودا الحاجة اللي خلتني كقارئ عاوز أنجز وأقرأ اللي بعده بسرعة عاوز أعرف مين الشخص دا وايه حكايته وصفاته و…و… ودا لون من الكتابة أنا شخصياً بحبه خصوصاً أنه أظهرلنا بعد كدا الشخصيات وفهمنا مكوناتها وبنفس الأسلوب اللي بيعجبني بالمواقف وليس السرد المباشر فقد جذبني الكاتب طواعيةً …
الرواية مركزة جداً مفهاش حشو أبداً فالكاتب علق القارئ بالحبكة بهدوء واخده في رحلته رويداً بترتيب أحداث تصاعدي عجبني جداً ومتقدرش تتوقع الأحداث أبداً ودا إبداع الحبكات اللي عمله الكاتب بمهارة …
الحوار جه متشابه في الألفاظ بين الشخصيات المختلفة ودا مش حلو أوي لكن ممكن نتفهمه ونقبله لأن أصلاً أحداث الرواية مبتحصلش في بيئة عايشنها فنقدر نحدد هم بيتكلموا ازاي أصلاً دا غير ان عندك احساس انها مترجمه فمش هتقف أوي عند الحتة دي ولكن لو الكاتب كان ظبطها شوية وحط ألفاظ فصحى مميزة لكل شخصية كتعويض عن ان مفيش الفاظ مميزة للبيئة لأصبح الإبداع إبداعين ولكن بالوضع دا لا ينتقص الإبداع أبداً …
من الحاجات اللي بحبها جداً ان الحوار هو اللي يوضح الشخصيات مش المونولوج ولكن الحوار مش بشكل س و ج
الإبداع الجميل أن رسملنا الشخصيات بدقة بردود أفعالهم وحواراتهم وبدون مونولوجات مسهبة ودا شئ لو تعلمون عظيم وأعشقه بشدة …
في فخ معظم صناع القصص بيقع فيه لما يكون بحثه قوي ومستفيض أو لما يكون في خلفيات يريد سردها ليعلمها القارئ فقط لكنها ليست الحبكة الأساسية لكن هتتبني عليها الحبكة و ستؤثر في الأحداث المستقبليه وأحياناً بيستخسر الكاتب ميكتبش معلومات تعب كتير علشان يجمعها فيبدأ يسردها بدون حبكات صغيرة توضحها بدل سردها فتتحول بعض أجزاء الرواية لمقالات قصيرة…
هنا بئا و لاحترافية معالجة الكاتب لهذا الفخ فدمجه في تفاصيل الحوار ولكنه مازال فخاً حاول معالجته فأصبح قصير وخاطف مش سهل القارئ يحس بيه ودا جمال في حد ذاته ولكنه مازال فخاً … أرى إن ذكر الخلفيات دي أو المعلومات لو كان ضروري ، يبقا يجب توزيعها على طول الرواية بدقة وبتورية بحيث لا تتحول إلى مقالات قصيرة ولكن في المجمل عالجها الكاتب باحترافيه شديدة عجبتني … ( حصل بقلة جداً في بدايات الرواية )
.
التقييم ولست أهلاً للتقييم
( #لقد_نجحت_الرواية_أن_تكون_عمل_أدبي_يحرك_العقل_والقلب_فتجازينا_بالمتعة )
لمتابعة كل كتاباتي من نشاطي الكتابي من خلال الهاشتاج دا :
#سينما_في_رواية
#محمد_محروس
رابط الرواية على. #أبجد
****