ملحوظة أولية : دى اول قراءاتى لدان براون ومعرفش ايه سبب التأخير لحد دلوقتى بالرغم من ان الرواية موجودة عندى هى وغيرها من اعمال براون من أكثر من 3 سنين !

حجم الرواية ف الاول خضنى وجالى وسواس داخلى انى مش هقدر اكملهازى ما عملت مع كتب كتير الفترة دى بس قولت اجرب واشوف

صفحة واتنين وتلاتة ولقيت نفسى وصلت للصفحة 50 ف قعدة متكملش ساعة الا تلت !

القعدة التانية وصلت لحد 321 ، والتالتة خلصت الرواية

شعورى بعد ما خلصت الرواية مختلف تماما عن شعورى قبل ما أبدأ فيها ،، شعور بيجى للواحد لما يحس ان الكتاب كان ع درجة من التميز تخليك مش عاوز تخلصه وف نفس الوقت عاوز تخلصه عشان تعرف الحقيقة ولما تخلصه تزعل انك خلصته ! حد فاهم حاجة !!

اساس اى عمل ناجح هو انه يخليك تفضل ماسكه ومتقدرش تشيل عينيك من عليه الا وقت النوم وبس ! ومهما كان كبر حجم الكتاب تخلصه ف وقت قياسى وده اللى حصل معايا

اسلوب دان براون خطير جدا بيخليك تحس ان الوقت بيتسرق وانت مش حاسس بيه وتلاقى نفسك هوب ساعة والتانية والتالتة وخلصت اكتر من نص الكتاب ازاى معرفش !

فكرة الرواية نفسها لا غبار عليها والاهم من ده كله هو الحبكة اللى حط فيها دان براون القصة ،، ف روايات كتير فكرتها حلو لكن كتابها فشلوا ف صياغتها بشكل يتناسب مع الفكرة بس دان براون كان متميز ع اكتر من صعيد سواء الفكرة او الاسلوب او الحبكة او التشويق

الرواية دى خلتنى احس انى بجرى مع ابطال الرواية وعاوزة اعرف الحقيقة زيى زيهم ، تخليك تحس بكل المشاعر اللى هما حاسيين بيها وتتفاجأ معاهم اكنك ف وسطهم وتحس بالصدمات

اللى فادتنى اكتر ف الرواية دى انى قبل أسبوعين كنت قرأت كتاب اسمه " سر مريم المجدلية " وكان متشابه لحد كبير مع فكرة دان براون خاصة مع وجود تشابه بخصوص وجود الجماعات الدينية واسرار مخفية عن المسيح والكنيسة وغيرها ، فده خلانى متنبهة جدا للى مكتوب واربط ده بده وطلعت باختلافات صغيرة بين الكتابين بس الجوهر متشابه لحد كبير جدا عشان كده الموضوع ده واضح انه محتاج قراءات تانية لمزيد من التوثيق او الاقتراب من الحقيقة ع الاقل

انصح اى حد عنده فتور حالى من ناحية القراءة او حتى عمره ما فتح كتاب انه يقرأ الكتاب ده ع الفور ومش هيندم

ملحوظة اخيرة : تقييمى للكتاب 4 نجوم ونص ،، والنص نجمة المفقودة لسبب مش عارفاه لحد دلوقتى صراحة !