مصري جداً جداً .. ولكن هذا لا ينفي أن الكثير قد لمسني .. بعضٌ من فيض:-
عشا باهت
وسَهْرة مِ الوَجع
نامِت
مَنام ساكت
ولا بيرِفّ بالأحلام
ولا بتفْرق ساعاتُه كام
يعُضّ الليل صوابعُه يئِن..
مايْئِنش
يحِنّ ل طِيف .. ما بيحنِّش
______________
أنا سهرتين
كانوا على كورنيش كلامِك
وانتهيت
أنا ندهة الغربة في صوتِك
لما غربني نداكي
وتهُت في الزحمة وبكيت
أنا حارة سدّ
وبيت ما عمره سِكنه حدّ
شباك ومقفول ع اللي جوا
واتكسى بالعنكبوت
______________
جرَّب تشوف دمك وتختبرُه
يمكن يكون أسفلت
متنَكَّر
في شريانك
يمكن تكون شرايينك نفسها
أنابيب
وبتكرَّر في قطرانك
يمكن تكون انتَ
صفَّاية بني أدميين
كُلّ اللي بيعديك بيسيب سوادُه
فاعجن دراعك واحتِمل
لمّا تِغْرز في الوريد
مواسير هوا
وانْزِف
انْزِف
انْزِف
______________
يا باب
أنا كان لي وراك احباب
وياما عدّيناك
ياما ردّيناك .. عن خوف
ياما سدّيناك .. لنشوف
وياما كنت تتزحزح
عشان نفسين هوا يخُشوك
فَ بُص ف وشّي
يمكن تلقى جوز عيون
يجوز .. وحشوك