مناسك الخوف

- ابويا بيلم السنابل فى الغيط.

- وابويا بيلم السمسم حوالين البيت.

- امى بتملا القنديل.

- وامى بتخبز عند ام خليل.

- تعالى نرسم.

- نرسم إيه؟

- هاتي بس السلم.

- وطلعت من جيبي الطباشير، ورسمنا قلب على باب البيت.

- بس انت مشيت.

- رحت لأمى اللي بتستلف زيت للقنديل.

- وأنا ناديت على أمى وهي بتخبز عيش لأم خليل.

- وأبويا وابوك لساهم فى الغيط.

- ولساها حيطان البيت مشقَقَّه.

- وكف ابويا بتِشْلِب شقا.

- والسنابل والسمسم ...

- مالهم؟.

- هيخلوا عيشتنا ضيقه؟

- تعالي نجيب السلم.

- تعالى.. ليه؟

- نرسم بيت.. شجره وعصفور بيزقزق.

- انا عايزه بيتنا محندق.

- ﻻ..ﻻ.

- ﻻ؟ ..ليه؟

- انا هرسم بيتنا واسع جدًّا.

- علشان عصفورنا يطير ويزقزق؟

- وعلى سطوح بيتنا ييجي اليمام ويعشش.

- وتبقى الشجره مركب.

- ونركب.

- نخلة طويلة.

- نخله طويله جدًّا جدًّا.

- وسقف السما هيقرب.

- ونجيب الغيمة.

- تطرح تمر.

- وتملا جيوبنا حَب.

- وندهن حيطة البيت.

- ونملا القنديل زيت.

- وامى تبطل تخبز ﻻم خليل عيشها.

- عشان تاخد أُجرتها حَطَب ووقيد ورغيفين عيش.

- وتبطل تخبز عندها عيشنا.

- ويبقى عندنا حطب ووقيد.

- وشجره ونخله.

- ومركب.

- وبيتنا تملاه ريحة العيش.

- ونعيش.

- بتحبيني ياحنة؟

- ابويا مات وامى لسه مجتش----

مناسك الخوف، دار الأدهم للنشر والتوزيع، 2019، ص ص 207-206

****