مراجعات رواية أم ميمي

بالورقة و القلم...خدتينى ١٠٠ قلم..

أنا شفت فيكى مرمطة وعرفت مين اللى اتظلم..

عارفة سواد العسل..أهو ده اللى حالك ليه وصل..

إزاي قوليلى مكملة و كل ده فيكى حصل!

مصر..بلدنا الحلوة اللي فيها كل حاجة وعكسها..فيها الغني وفيها الفقير ..فيها الجاهل و فيها المتعلم ..فيها كُتاب بتمشي جنب الحيط و فيها كُتاب تانية عاوزة تكسر الحيط..

وبلال فضل في أم ميمي كسر الحيطة دي علي دماغنا كلنا:))

أم ميمي...الرواية التي دخلت القائمة الطويلة لجائزة البوكر للكاتب المصري بلال فضل...

قبل قراءة هذه الرواية يجب أن نذكر أنفسنا إن الأعمال الأدبية مش من واجبها أبداً تجميل الواقع بل العكس تماماً..

العمل الأدبي ما هو إلا مرآة للواقع الذي نعيش فيه..مرآة تلقي الضوء علي كل فئات المجتمع و تبرز عيوبه قبل مميزاته ولو عاوزين نقرأ عن الجانب المضئ فقط يبقي يكون أفضل إننا نبطل قراءة!

تدور أحداث الرواية حول طالب مغترب قام بتأجير غرفة في منطقة شعبية بمنزل أم ميمي و بياخدك بلال فضل للتعرف علي عالم أم ميمي ،إبنها،طليقها عشماوي الزناوي و جارهم أبو سامية الم***.

شخصيات مختلفة في عالم مختلف..

عالم بعيد تماماً عن سكان المعادي و مصر الجديدة والأحياء الراقية في القاهرة..

عالم المناطق الشعبية أو ممكن نقول قاع المجتمع المصري اللي انت مش متخيل إنه موجود و حتي لو تعلم بوجوده فعادة تُفضل أن تغض بصرك عنه وتتجاهله!

في هذه الرواية يقوم بلال فضل بتعرية المجتمع المصري ..يلقي الضوء علي الفقر و تاثيره علي أفراد المجتمع...

الفقر اللي ممكن يخلي أب يبيع بناته و يستبيح أعراضهم عادي جداً و ممكن أيضاً يجعل من أب آخر يترك أولاده و زوجته شوية عند محطة الاتوبيس لإستقبال من يريد أن يمارس الدعارة في شقة الزوجية عشان يزود دخله!

إتكلم أيضاً ولو بطريقة غير مباشرة عن فساد رجال الشرطة و عن إستباحة البنات الفقراء من قبل الأغنياء أو أصحاب المصانع وحتي عن التعصب الديني اللي عند بعض الشباب و تحريمهم مثلاً للفن والسينما..

إسلوب السرد في الرواية كان ممتع جداً لدرجة إني خلصتاها في يوم واحد وعلي الرغم إن الرواية بتعبر عن واقع أليم يعيشه الكثيرون إلا إنها تعتبر كوميديا سوداء مكتوبة بمنتهي الذكاء و حتخليك تفطس من الضحك في معظم الكتاب...

الحوار كان بالعامية في كل الكتاب و الصراحة مكانش ينفع يكون بالفصحي..

إستخدم الكاتب ألفاظ خادشة للحياء في كل الرواية ممكن تعتبرها ١٨+ ...٢٥+ ...زي ما تحب:) بس صدق أو لا تصدق هي جاءت مناسبة للعمل و أضفت عليه واقعية و جعلته حقيقي جداً..

إستطاع بلال بقلمه أن يعبر عن هذه الفئة بكل صدق وشفافية و من غير حتي ما يذوق الكلام ودي حاجة أكيد تحسب له مش تحسب عليه!

والصراحة من كتر ما الكتاب لمسني جداً أكاد أشعر إنها ممكن تكون سيرة ذاتية لبلال فضل نفسه والله أعلم:)

نحن أمام رواية إستثنائية..مستحيل حتعرف تنسي شخصياتها...كاتب ذكي ...جرئ..دمه خفيف بشكل غير عادي..خلاني أسيب الكتاب وأضحك بصوت عالي وحيخليك إنت كمان تضحك من قلبك:)

لو عاوزين تركزوا 'فقط' علي ما جاء في الرواية من ألفاظ .. براحتكم..أنا عن نفسي شوفت ما هو أعمق و أهم من شوية كلمات و إستمتعت بيها وجداً كمان:)

لو عاوزين تمنعوا الرواية خالص .. برضو براحتكم بس إحنا عرفنا نجيبها و قرأناها..

أما بقي لو عاوزين تتجاهلوا إن بلال فضل الكاتب المصري إترشح للبوكر..مش براحتكم :) عشان أم ميمي في القائمة الطويلة شئتم ذلك أم أبيتم...

كل التوفيق لإبن بلدنا المبدع بلال فضل ومبروك الترشيح رغم أنف الجميع:)

كعادة بلال فضل يقدم تجربة قراءة مميزة، قراءة ممتعة وغير مريحة في نفس الوقت ربما لأنها تحرض على التفكير وكسر ال(تابوهات)، لن يقدم لك وصفة سهلة مجربة تتحدث عن طيبين وأشرار بينهما برزخ لا يبغيان، بل كل تناقضات البشر ومساوئهم وعورات نفوسهم البشرية التي لا تتخيلها، والتي قد يخجل حتى أصحابها من مواجهة أنفسهم بها.

بالتأكيد ستستمتع بتجربة ثرية مع هذه الرواية فقط لو استطعت أن تتسامح مع تكرار بعض الألفاظ التي يصح أن نسمها بذيئة، وعن استخدام بعض نصوص دينية (أو سمها تراثية إن شئت) في غير موضعها، مواضع أحيانا تصل إلى التندر أو شبهة السخريا

على سبيل المثال لا الحصر تساءلت عن جدوى التندر بحديث شريف يتحدث عن أسنمة البخت (قالها الكاتب أسنان البخت) وهل يجب اعتبار ذلك تقليل من شأن النص الديني أم أننا يجب أن لا نخرج الأمر من سياقه الأدبي من مجرد تساؤلات بريئة طرأت في ذهن بطل رواية ولو بشكل ساخر؟

بلال الحكّاء..

‏‎#بلال_فضل حكّاء استثنائي، لديه القدرة والمهارة والذكاء إنه يسحلك مع حكيه سواء الشفهي أو المكتوب، وعنده البراعة في التقصي وراء المهارة دي دون ملل أو إملال بل بمتعة حقيقية وسخرية محفزة وطاقة حيوية بتخليك لا تملّ لو سمعته أو قرأت له بالساعات.. ‏

بيستطرد في حكيه وكأنه خارج من قلب ‎#ألف_ليلة_وليلة أو منشد شعبي بيبهرك بحكايات من قلب البشر والناس بطريقة سحرية تمس القلب، وبتحافظ دائما على طزاجتها وحيويتها

تقرأ رواية أم ميمي الممتعة وكأنك تسمعها شفاهة من بلال وهو مستطرد في حكيه الطازة.. رواية تشتبك مع عالم خفي قد نتواطأ على إنكار وجوده جميعا لكننا نستمتع بالحكي عنه من ورا البيبان أو التجسس عليه، لكن بلال كان أجرأنا في نشره ف عز الضهر في لحظة روائية توثيقية بديعة وممتعة ومحفزة جدا

تحية ل ‎#بلال_فضل الجميل 🌷

ليست رواية ... بل هي حكاية تندمج معها بسهولة لأن بلال فضل كاتبها شكله معروف و غالبا هتكون سمعته بيتكلم قبل كده و ده هيساعدك تتخيله في كل مواقف الحكاية خصوصا لو كنت سمعت منه كتير قبل ما تقرأها و هتعرف ان فيه حاجات كتير من الحكاية حصلت فعلا في حياته و ده هيساعدك علي الاندماج اكتر

عيوبها :

- الاستخدام الغير موفق للشتيمة في بعض المواضع يعني ساعات بتكون الشتيمة ملهاش لازمة في الجملة او كان فيه شتيمة احسن منها و مناسبة اكتر للموقف و ده بيخليك تحس بان الكلام مصطنع و بيفصلك من الاندماج في القصة (و ده ميخليناش ننسي ان الشتيمة حرام اصلا)

-تاني سبب هو التطويل في بعض الأجزاء و وصف بعض المواقف و الاحاسيس خصوصا في الاخر ده برضه هيخليك تفصل من الاندماج في القصة و تعدي بعض سطور او صفحات علشان الملل