اقتباسات من كتاب الزمن ـ ديوان شعر بالعامية المصرية

أمشي في ليل القاهرة المُظلِم

‫أمشي بيأس القاتل المضطر

‫أمشي برهبة محدثين الشر

‫أمشي لأني لو وقفت أموت

‫أمشي لأن الموت هنا مؤلم

‫هوَّ عاوز يقتلك ..

‫وانتا عاوز تهزمه بفرق النُّقط ..

‫«ماتوا رافعين اليفط »

‫إوعاك تموت عامل كده

‫ما بكيتشي م المنظر

‫الدم أوقات كتيرة.. كان بيبقى أكتر

‫لاكن بكيت النهارده

‫لأني لما شفت الدم.. ما بكيتشي

كلمة نور أخت كلمة سور ‫وكلمة أب أخت كلمة رب ‫اللغة هيَّ اتفاقنا من قبل السنين؟ ‫ولَّا صوتنا سوا ‫اللي ما بنعرفش ده صوت مين؟ ‫ولَّا اللغة كائن تاني ‫بعقل مفصول جوَّاني؟ ‫ولَّا ببساطة المزيكا ‫هيَّ اللي بتملي الاتنين.

في هذا الديوان

‫أسألُ وأُجيب

‫أُخطئ وأُصيب

‫وأعني ما أقول

‫وأقول ما أعني

‫فدعني

❞ مزيج بين الأمل والصبر

‫حاجة ما بين السواقة وبين ركوب القطر

‫بين المعافرة والتسليم

‫خلطة ما بين آمال بُكره ..

‫على أماني عودة امبارح ..

‫على محاولات انك تعدِّي م النهارده سليم ❝

‏❞ المتأكدين مش أغبيا

‫على الأقل ماشيين ف اتجاه

‫المتأكدين ..

‫ناس ما ينفعش تسمعنا

‫المتأكدين ..

‫هما اللي بيمشُّوا تروس الحياة

‫واحنا ..

‫لسه بندوَّر على المعنى ❝

‏❞ ‫الشك عمره أطول م الحقيقة

‫بيموت فبيتولد غيره ف نفس الدقيقة

‫والحقيقة

‫أجمد م الرخام

‫الشك بيرتوي بالوقت

‫والحقيقة بتغرق شبر شبر ف الأيام ❝

‏

‏❞ تهرب لفين يا ابن الحياة م الزمان الأب؟

‫تعرف منين ..

‫ده عقاب ..

ولَّا تسلسل منطقي ..

‫ولَّا امتحان الرب؟ ❝

❞ بقول لنفسي كأنه عزِّل ولَّا ساب البيت

‫يا صاحبي ما تقولش انتهيت

‫يمكن تكون دلوقتي بس بدأت

‫مفيش حاجة ممكن تهزمك دلوقت

‫مفيش حاجة ممكن تئلمك ف الموت

مفيش بُكره ممكن يقلقك م الوقت

‫ولا حد ممكن يغلبك بالصوت ❝

‏❞ ‫أنا الزبون الدائم للمطاعم اللي بيسهروا لمتأخَّر

‫صديق كلاب المنطقة من غير أسامي

‫شهواني وملول

‫وعدو الناس اللي بتتكلم علطول

‫تلميذ خيبات الأمل المتتالية

‫ومن أنصار الباب المقفول ❝

‏❞ ‫ف الأيام الصعبة ونا شحط

‫بفتكر الأيام الصعبة ونا عيِّل

‫وبقول عديتهم وانتا قليِّل

‫مش هتعديهم دلوقت؟ ❝

❞ مش كل حاجة بنعرف نحط كلمة مطرحها

‫الدنيا لسه فيها حاجات ما بنعرفش نشرحها

‫طول ما موجودة.. الدنيا ما اتهدِّتش ❝

‏❞ ‫الحياة مش كلها انبهارات

‫ولا تجارب سُخنة بالبهارات

‫والليالي المدهشة حلوين

‫بس السنين المملة

‫هيَّ اللي بنت حضارات ❝

‏❞ يا هل ترى صوت الهزيمة ولَّا صوت العقل

‫اللي بيوشوش ف ودني بالراحة بدون أنفاس : مش شرط يعني نغيَّر الدنيا ..

‫كفاية حتة صُغيرة فينا ..

‫أو حتة صُغيرة ف الناس ❝

‏❞ حياتك.. مهمة لبياعين الحلم

‫وَفاتك.. مهمة لبياعين القُرَص

‫حسابك حتى في قبرك.. مهم

‫رخصة الجنة مهمة لبياعين الرُّخَص

‫ولبياعين الدِّين

‫ولبياعين الآخرة اللي هتنصف المساكين ❝

‏❞ بشرى لأبناء العالم التالت م العالم الأول

‫بشرى لأبناء العالم الهمجي م العالم الإنسان

‫العالم الحر اللي ما بيضربش ف المليان

‫بس بيجوَّع بلاد لحد الموت

‫القاتل الشيك المحترف.. أبو طلق من غير صوت ❝

‏❞ آخر حصون الإنسانية الفن ..

‫والفنانين حرَّاس ❝

❞ أمريكا فيها الحلم

‫وبلادنا فيها كابوس

‫الناس تخاف ..

‫أمريكا تحميهم

‫الناس تجوع ..

‫أمريكا تديهم

تِكسي بالإيد اليمين اللاجئين.. بعد ما إيديها الشمال تعرِّيهم

‫شركة بتهِد البلاد وشركة تبنيهم

‫شركة بتبيع السلاح

‫وشركة بتطبطب على اللي يموت

‫العالم بيتقسِّم دول

العالم بيتقسِّم بيوت ..

‫العالم بيتقسِّم لبني آدم ولبنكنوت ..

‫مكتوب على شهود البلاد ..

‫الممسوحين بأستيكة ..

‫أنتَ حر ..

‫ما لم تضر ..

‫أمريكا ❝

‏❞ ‫محدش هيقدر يطبطب عليك

‫مفيش إيد هتسند إيديك غير إيديك

‫يا تستنى نفسك وتبحث ف ذاتك

‫يا تلحق تلم وتشوف اللي فاتك

‫لقدام هنمشي هتمشي وهمشي

‫ندور ويَّا عقرب ساعاتي وساعاتك ❝