أعتقد إن ألطف طريقة لكتابة للتاريخ، بعد ذاتيّته السيريّة (لو كانت دي كلمة حقيقية أصلا، أو لو كان دا تركيب اشتقاقي جائز في العربية مثلا)، هي كتابته بشكل حلو.
وبثينة هنا عملت الاتنين؛ كتبت سيرتها مع قانون كويتي، وكتبتها حلو.
زمان، مش فاكر أمتى، وذاكرتي قاصرة خلّاقة، قريت بوست فيسبوك للكاتبة بتقول، ما معناه، أو اللي وصلي منه: إنها مستعدة تصدق مقالات ماركيز الصحفية عن تأريخ العالم، حتى لو كان بيكدب. وهي هنا متقصدش إن ماركيز مدلس، بقدر كونها تقصد إنه الكتابة الجميلة قادرة على جعلك تهتم -أو تصدق- بحاجات مكنتش هتهتم بيها، في الأغلب، في حياتك أبدا. دا انطبق فعلا، في وقت لاحق، على قراءتي لمجموعة مقالات ماركيزية في كتاب "بلا قيود"، وحسيت بجد اللي قصدته الجملة دي. ودا بيتكرر تاني هنا، مع "شرف المحاولة"، فيبدو إن المقولة دي مش حكر بس على كتابات ماركيز.
ازاي ممكن تخلي أي حد يهتم بقضية شديدة المحلية، شديدة الرجعية لحد التخيل؟ معنديش أدنى فكرة، بس اللي أعرفه إن بثينة خلتني أهتم بقانون المطبوعات الكويتي أكتر من الكويتيين نفسهم. وأنا اللي مكنتش أعرف عن الكويت حاجة غير قيمة عملتها، وبعض من كتبها وكتابها، والقليل من قضايا الأقليات هناك.
كل دا أختلف دلوقتي، بالتجربة دي، شديدة الصراحة والتعقيد، وجميلة الرواية؛ أخاذة، مرعبة في حقيقتها -عن دولة أوروليّة بامتياز بتمنع كتب لحد ٢٠٢٢ وبتمارس رقابة بغيضة، غير عقلانية، على ملايين من البالغين في عصر العولمة!!-، مكتوبة بطريقة مكانتش هتكون أحسن من كدا. مين كان يصدق إني أخلص الكتاب في جلسة واحدة من فرط جماله، مش طبيعي بجد!
فشكرا يا بثينة على رواية العالم.
ملاحظة: يبدو إن الإشاعات عن جنة الكويت إشاعات فعلا، ويبدو إن محدش في العالم دا حر بشكل كامل فعلا، البشر بيتفننوا في قهر الآخرين بمبررات بليغة. ويبدو إن لكلٍّ مشاكله الخاصة، وقدام مشاكل الآخرين تظهر حريّات صغيرة في كل مكان.
أتمنى إن الكتاب ميتمش ملاحقته قضائيا في الكويت أو خارجها، بأي تهمة مش هتكون غير تورية؛ معناها القريب الحفاظ على القيم ومنع هجاء آخرين، ومعناها البعيد، المغضوب عليه، شجاعة قول الحقيقة.