سيرة القبطية
شيرين هنائي
تاريخيه - ادب سيرة
التقييم ١٠ من ٥ ❤️
اللغه .. اللغه ومفرداتها جميله جداا ، فهي فيها معاني عميقه وف نفس الوقت سلسه جداا وبعيده تماما عن التعقيدات اللغويه اللفظيه .. كمان اسماء الاماكن اللي بالقبطي كانت موفقه جداا كتعبير عن الحقبه دي .. حتي لو كانت الاسماء صعبه علي التذكر لكنها كانت ضروريه وحقيقي خطوه واضع فيها المجهود 🌷
الحقيقه الروايه كلها واضح فيها المجهود الغير عادي ❤️
ازاي كاتبه بخلفيه غير مسيحيه .. تكتب عن شخصيه قديسه مسيحيه في زمن قديم كده ..
بكل التفاصيل الدينيه الممكنه ..
كان واضح جداا ف الحوار بين الاشخاص كان فيه طابع ديني بلا تكلف ، وسليم ومنطقي ف الواقع ، وصحيح عقائديا !!
واضح في اسماء الفصول وتسلسلها ❤️ ، تفصيله عظيمه جدا
واضح جدا جدا في الاقتباسات من الكتاب المقدس اللي كلها في محلها
واضح ف الحوار والفلسفه الدينيه ف صوره معلم فيرينا الهيليني .. والحوار الاخير( مش هحرق احداث )
حتي تفصيلة زواج الاساقفه .. لما رجعت اتاكد من تاريخ الكنيسه كان اقرار اختيار الاساقفه من الرهبان المتبتلين في مجمع نيقيه عام ٣٢٥ .. وقبل هذا التاريخ كان من الممكن اختيار اسقف متزوج علي ان زوجته تساعده ف الخدمه ويكونوا ف تبتل بعد الرسامه .. زي ما حصل ف القصه تمام
حقيقي كنت متفاجاه ومبهوره ومش مصدقه جمال العمل .. اللي بيدل علي دراسه الكاتبه الواسعه لكل التفاصيل ، والمراجعه اللي تمت للروايه عشان تكون سليمه
وان العمل فعلا اخد وقته عشان يطلع للنور (مش مجرد اهي روايه والسلام )
شكرا حقيقي للتحفه اللي سرقت مني الوقت والنوم علي مدار ٣ ايام .. وكنت اتمني انها متخلصش 🌷❤️
وسعيده اني اتعرفت علي كاتبه مش بيحدها لون معين من الادب ، واكيد هنتقابل ف قراءة اعمال تانيه❤️