كان نفسي أبدء المراجعة دي بجملة زي اهلا بعودة الجندي.. و فعلا خلاص كانت قربت اوووي تبقي العودة بس ايه الي حصل☹️
بنبدء العمل مع داوود الكاتب الي طول عمره بيكتب روايات رومانسية و حب فجاة يكتب رواية جريمة عن قاتل متسلسل عايش حقيقي وسط الناس بل و ممكن يكون علي معرفه شخصية كمان بداوود ؟!
و داوود بدء بالفعل في كتابة الرواية وهي بالمناسبة في اعتقاده انها روايته الأخيرة لانه حاسس انه هيموت بسبب سرطان المخ الي عنده....
بعد قراءة ايام مع الباشا و صلاة الممسوس الي بكل آسف كانوا دون المستوى الي متعودين عليه من الجندي كنت بتمني ان الرواية دي تبقي صُلح لينا... و لازم احترم جدا ان الجندي قرر في العمل دا انه يبعد عن حتة الجن و ما إلي ذلك
بس برده بنكتشف في الاخر ان العمل لا يخلو اوي من لمسات الجندي في العالم دا.. ولكن.. الرواية تعتبر جريمة في المقام الأول
العمل منقسم لجزئين اول جزء الي فيه بنشوف الرواية الي كتبها داوود و الي حقيقي كانت شخصية مبنية كويس و اتأثرت بيها جدا و شفت كم معاناة مريض المرض اللعين دا
داوود اثناء ما كان بيكتب روايته عن هذا القاتل كانت اشبه لمذكرات يومه العادية بلمسة ادبية لا تخلو من العبث و الكوميديا السوداء اللاذعة الي متعودين عليها من الجندي♥️
و الجزء التاني من العمل وهو سرد ما بعد كتابة داوود للرواية و الاحداث الي بعدها ولازم اقول هنا ان الجندي نجح جدا في ابراز طريقة السرد و اللغة في كلا الجزئين.. بمعني ان لما كنا في سرد داوود و كتابته لروايته كانت طريقة السرد و الكتابة مختلفة في الجزء التاني الي بدء الجندي يسرد فيه احداث روايته عادي و دا كان شيء جميل و عمل فاصل بين طريقة كتابة داوود و السرد العادي
السرد في المجمل كان بعربية فصحي بسيطة و سلسة و الحوار كذالك كان بالفصحي المُطعمة العامية
شخصيات العمل كلها كانت محتاجة تصميم و بناء احسن من كدا بكتير ما عدا شخصية (داوود) الي كانت مرسومة بطريقة جيدة جدا
لكن مثلا شخصية القاتل كانت محتاجة شغل اكتر.. دافع القتل موجود تمام بس محصلش تاثير عليا من الشخصية زي ما حصل مع داوود
زي ما قلت في الاول الرواية بعيدة شوية عن جو الجن و كدا بتاع الجندي بس برده جه في الاخر و حط التاتش بتاعة 😂😂
و راح مدخل تيمة الجن بشكل ما ف الاحداث البوليسية 🤷🏼
الرواية بها جرعة كويسة من الاثارة و التشويق الجديدة علي الجندي و بها بعض لمسات من الجزار ♥️💪
النهاية... اهههه من النهاية
نفس الي حصل في صلاة الممسوس نهاية متكروتة زي ما يكون الكاتب زهق من العمل و قال خلاص انا هقفل هنا
والله الرواية كان ممكن يطلع منها احسن من كدا بكتير مكنش لازم تدخل تيمة الجن و نقفل ان العمل جريمة و خلاص 🫤
الخلاصة يا جماعة
استمتعت بالعمل وهو بكل تاكيد احسن من صلاة الممسوس و ايام مع الباشا.. بس بكل تاكيد برده مش احسن اعمال الجندي