ملحوظة : - لو حد مقرأش الرواية ميقراش الريفيو ده لأنه بيحرق الأحداث

الرواية في اعتباري رائعة رغم اني كنت أفضل انها تلعب عالمنطق مش على السحر وعالم البرزخ خصوصاً ان احمد مراد أغلب الفئة اللي بتقرالو مثقفة وبتعتمد في قرايتها عالمنطق مش عالسحر.

النهاية معجبتش ناس كتير بس انا في رائي عجبتني جداً وتفسيري للنهاية على قد تحليلي هو ان نائل بيرصد يحيى من زمان علشان ياخد لبنى وده ظهر في جميع اجزاء الرواية الكلب لما كان بيظهر ليحيى في بيته كان بيرصد تصرفاته واول مره يحيى قابل فيها نائل كان عارف عنه كل حاجه وعن مراته نرمين فالموضوع مكانش ان نائل انتقل لجسد يحيى بعد خروجه من شريف لا هو بيرصده من زمان ولو نلاحظ هنلاقي ان في اخر الرواية تاكي اللي بيبيع الفيل الازرق اختفى ومعادش له وجود لأنه كان موجود فقط لخدمة نائل علشان يعرف مايا عالصنف الجديد (الفيل الأزرق ) علشان هو عارف انها هتخمس فيه مع صديقها يحيى ويكون الفيل الأزرق بوابته لعالم البرزخ.

الطلاسم والارقام اللي طلع يحيى بيها نائل من جسم شريف مكانتش مترتبة ترتيب صحيح ولكن كانت على حسب نية اللي بيقولها وشريف كانت نيته يطلع نائل وده اللي حصل لكنه انتقل لجسد يحيى لما دور على طلسم النكاح جاتله مرات المأمون ودخلت مادة رمادية في بقه نقلت الوشم ليه ونائل سيطر عليه وعمل معاه نفس اللي عملو مع شريف لأنه من الأول كان نفسه في لبنى وخلاها حامل ولبنى فاهمه انها حامل من يحيى مش من نائل وده تفسير ان مرات المأمون اللي كانت بتيجي لشريف هي لبنى لأن نائل من الأول بيتخيلها على أنها مرات المأمون.

الرواية معقدة شوية بس عجبني الحبكة اللي فيها والنهاية كان ممكن تطلع بأحسن من كده بس في الاخر أحمد مراد أبدع فيها

تقييمي 4/5