- حبيت الكتاب جداً جداً، يمكن في بعض إسقاطات محدودة شوية في بعض التفاصيل لكن تجربة البحث عن جدوى الحياة وجدوى العيش في الدنيا بشكل عام بيتهيألي مرت على معظم البشر، بعد موقف صغير جداً أو كلمة أو إشارة ممكن تفتح باب التفكير في الموضوع وممكن في النهاية يوصل بينا لما لا نهاية له، فالرواية فلسفية في المقام الأول.

- طبيعي جداً يكون التفكير الأول اللي يفكر فيه أي رجل تحديداً في حالة زي عمر إنه يدخل في علاقة مع ست مختلفة غير زوجته وهو ده اللي حصل، وفرحت جداً لما وصل لاستنتاجه إنه مش ده الحل خالص أو المشكلة مش هنا، لأني كنت هحس بإحباط شديد لو كان ده حل المشكلة.

- مش عارفة ليه لما قريتها جه في بالي فوراً كتاب الراهب الذي باع سيارته الفيراري لروبن شارما، واللي صدر لأول مرة عام 1998 في الوقت اللي صدرت فيه الشحاذ عام 1965 وهي دي العبقرية إنه نجيب محفوظ سبق بعشرات السنين ووصل لنفس الفكر اللي يادوب ظهر في التسعينيات وفيه نفس فكر البحث عن الذات وعن الهدف من الحياة.

- الرواية رغم إن صفحاتها قليلة لكنها دسمة ومقدرتش أخلصها حتى في يوم، وبشكل عام التجربة كويسة جدا جدا.