مشكلتي مع الرواية انها طلعت اقل من توقعاتي اللي بنتها بناء على ارآء مسبقة من ناس كتير .. لكن منكرش ان فكرة الرواية جديدة اكتر جزء عجبني فيها هو "حسام التلميذ" خاصة الجزء اللي اتكلم فيه شمس عن الشيطان (لابد ان فكرة ان الشيطان يقبع خارجنا تمنحنا احساسا كبيرا بالراحة ,و مخرجا سهلا).. في جزء تاني من الرواية فكرة الحب الخالص لله , عبادته عشان انت بتحبه مش عشان الخوف من العقاب او الطمع في الجنة .. فكرة التخلص من الزهو بالنفس ,عدم الحكم ع الاخرين لمجرد تصرف صدر منهم وزي ما بيقول الشافعي:(وعينك ان ابدت اليك مساوئا..فصنها وقل يا عين للناس اعين).. كلها افكار جميلة .. القصة جديدة لكن انا حاسة ان القصة متناقضة مع عقلي ..عن شخصية ايلا مثلا مش مقتنعة بفكرةان الشخص يضحي بسعادة الناس التانية عشان سعادته الشخصية اعتقد ان ده يسمى انانية وقبل ما تحاول تغير الماضي انت المفروض تصلحه ولو منفعش يبقى تتغير.. اما عن شخصية شمس ,الشخصية بوهيمية زيادة عن اللزوم ومتناقضة مش مستوعبة فكرة انه يكون متواصل مع الله وانه يتخطى بعض الحدود الدينية ده غير شوية الخزعبلات اللي كانت مرتبطة بشخصيته قراية كف بقى ومفيش مانع انه يعرف اللي جوه نفوس الناس او انه يعرف ايه اللي هيحصل في المستقبل :\ .. وعن شخصية الرومي حسب ما ذكرت الرواية فالصوفية كانت بالنسبة له في حب شمس مش حب الله , الرواية عاوزة توصل لفكرة ان الانسان المفروض يمشي ورا قلبه بس انا شايفة ان المفروض الحياة تبقى مزيج من القلب والعقل زي ما ربنا ادانا قلب نحس بيه فبرده ادانا عقل نفكر بيه ..