أحمد مراد .. أدخل لروايتك دي من فين و لا من فين؟
أولاً, التلات نجوم بس على التشويق (نوعاً ما) و خيالات الفيل الأزرق اللي عجبتني لكن غير كده .. Excuse me!
(يلا بقلدك يا عم, كل شوية تكتبلي جملة إنجليزي في وسط الحوار .. اه و نسيت السمايلي فيس :) )
بدأت الرواية (وإستمرت و إنتهت) كما توقعت حشو بالجنس من أول صفحة! أنا في مصطلحات مقدرتش أفهمها كنت مقضياها تخمين! الصراحة نص إيحاءاته و خيالاته الجنسية مفهمتش إيه دورها في الرواية؟ أنه يبان أنه شخص بايع القضية و مش فارق معاه حاجة؟ ممكن تبان من غير إيحاء كل صفحتين!
أهنيه إنه إستخدم مصطلحات طبية و أعتقد من كلام ناس دكاترة أن دي نقطة تحسبله و إنه إستخدمها صح.
بس أنا بأعتب عليه كان المفروض يعمل المرجع ده و هو بيقول أسامي الكحوليات و الخمور و الحشيش اللي إستخدمها. لأن واضح أن السنتين اللي فاتوا أحمد مراد مكنش بيدرس علم النفس و لا الطب النفسي .. كان بيدرس انواع الخمرة.
طيب فهمنا مش كلنا عندنا زجاجة
Meister في التلاجة!
أحمد مراد شخصيته هنا كان مبالغ فيها جداً, و بعدين الأفورة ساعات مكنتش بتظبط صح معاه .. عايز تأفور ؟ أفور صح!
اسمها: For God's Sake
مش: For God Sake
يلا يا عم .. روايتك الجاية إن شاء الله إستخدمها.
وبعدين إيه حكايته مع ناشيونال جيوجرافيك, مش ماشية مع الراجل اللي بيشرب و مش بيسكر و (المفترض ) دكتور نفسي .. بغض النظر أن الموضوع هيقلب على عفاريت!
عجبتني نقطة أن في وسط الكلام كتب جملة "تم حذف الإجابة لإحتوائها على تلميح جنسي) تلميح؟ يا راجل ده الرواية كلها تلميحات!
و لا لما قال جملة "الفيلم الهندي المعاد الذي تشاهده للمرة الألف" ده اللي حسيته في حوار لبنى و يحيى.
بس مش هأنكر أن الجزء التاني من الرواية و تطورات الأحداث مكنتش متوقعاها خالص! و عجبتني خيالات الفيل الأزرق رغم نفوري منها في بعض الأجزاء.
بس من المفترض أنه بيقول أنه درس الطب النفسي سنتين و الكلام ده. إيه الداعي أنه يحول الموضوع من طب نفسي إلى مس و عفاريت و شيطان في الأخر. كان إكتفى بهلاوس الفيل الأزرق و إبتكر نهاية مناسبة.
كأنه بيقول أن مفيش مرض نفسي أو عقلي حقيقي و لو وجد فوراه مس أو عفريت راكبه .. سحر يا مفتري!!
النهاية أنا مستغرباها نوعاً ما أو مش فاهماها, هل معنى كده أن يحيى لبسه نفس "المس" اللي كان لابس شريف و لا إيه؟ عن طريق البنت اللي جاتله دي؟
لو حد فهم يفهمني معاه!
عموماً, هي تنفع فيلم مع بعض التظبيطات و يشيلوا كمية الجنس اللي فيها ده لأني مش هستحملها كتير, كل اللي عايزة أشوفه خيالات الفيل الأزرق هيعملوها إزاي ..